【兩個陌生麻甩佬嘅窩心Magical Moment】
（為保留原汁原味對白，下含大量粗口）
尋日原本諗住去挑戰極高難度嘅山，但一上車即刻污雲密佈仲落雨，我ad hoc咁喺架車會到嘅地方，求其轉條比較容易嘅路去行，出咗街唔想返屋企啦，咁就走咗上嚟呢度。事前完全冇諗過嚟，都冇做過任何資料搜集，憑感覺落咗車跟住一個方向隨心行，話曬港島果邊大部份鋪好曬，又點都唔會蕩失路，反而比有計劃咁去個目標仲自在。
然後，我行到個冇人山頂嘅一個亭，因為要回頭路落，呢個位唔似有人上，而條路我行咗大半日，都見唔到一個人，喺度抖抖飲啖水，見到有個伯伯，你眼望我眼咁。
咁鬼樣嘅天，我係完全冇諗過影日落，甚至相都冇乜打算影，都係行下算，點知就喺你最估唔到一刻見到呢幕，伯伯大叫：「喂哥仔耶穌光呀，你有相機，唔係唔影呀？」
我知道呢一刻唔係維持到好耐，即刻拎相機影，但冇乜好位Set腳架喎，阿伯伯見我咁樣，指下下面：「落少少斜行唔駛半分鐘有個平台架，開揚好多，不過我得拖鞋落唔到去，推薦你落去，不過呢，屌，小心啲。」
我有行山鞋就爬咗落去，果然好view，點知呢一幕比我想像中耐，我set埋腳架玩到好多張相。伯伯喺度嗌：「屌佢老母天文台昆鳩我，又話好天點知陰陰沉沉，等到依家先咁靚，屌，天黑嚕。」我唔知佢等乜，我以為佢自言自語冇理佢。
隔咗幾秒，伯伯又嗌：「喂喂喂，哥仔你仲喺度嗎？冇嘢丫嗎，唔好嚇我呀！」
其實我爬落去唔駛半分鐘就到，係有啲啲斜咁啦，我伸個頭出去：「我仲喺度呀，影緊相咋！」
伯伯話：「屌你影咁撚耐，我以為你爬咗去邊，唔好再落呀，再落就斜架喇！」
我：「冇呀，喺個平台咋！多謝你話我知有呢個位！係靚喎！」
伯伯好頂癮：「屌你老母死仔包，搞到我都想爬落嚟睇！」
我：「上面一樣啦，唔差得好遠，肉眼睇上面夠架喇，我影相先要開揚啲姐。」
如是者，我同佢隔住個山崖，竟然喺度吹水吹咗半個鐘，伯伯再嗌：「哥仔我走喇，夜晚凍呀，唔好咁夜走呀，應該冇人會再上嚟架喇，小心啲呀你！」
我：「我就走架喇。」
伯伯：「你影還影，唔好好似啲低能仔咁，爬出去影到仆街呀，小心呀。」
我：「天黑前我會走架喇。」
伯伯：「多撚謝你同我吹水，我以為喺度戇鳩鳩，成日都冇人上嚟添。」
我：「大家咁話啦。」
伯伯冇再睬我，幾分鐘後我爬返上去，原來伯伯已經唔知幾時走咗，有少少空虛。
去旅行最鍾意就係咁樣一個人行山，你永遠都會遇到啲其他行山客，但諷刺在喺香港，你一個人行山，就真係成日都得一個人，唔會遇到其他人。我唔知係自己搵得太偏，定還是個個都堆埋去同一堆路度，自問今日呢條路都唔係極冷門，竟然都係冇人。
無論外國定香港，當你長期一個人喺度行而突然遇到有人同你吹水時，堅會感咗個動，而阿伯真心關心你條友爬落去有冇嘢，唔係單單想r水吹咁簡單，堅以為你仆死咗定做咩癡線嘢，咁樣開到話匣，成件事好正。
唔好天有唔好天好處啦，呢一刻堅靚。
呢度係邊度？過兩日再講。
又老老實實，真係咁好彩遇到呢一刻，正常呢個位，我相信又冇乜特別嘅😂
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://bit.ly/3a9wOzy
或使用Payme link：https://payme.hsbc/jackyhei
或透過Paypal捐款：paypal.me/jackyhei
【MeWe請Follow】：mewe.com/p/travelerwithmovie
【IG請follow】www.instagram.com/travelerwithmovie
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
Search